Təşkilat: Habitat Tərcümə Layihəsi Campbell Biologiya – 2 (HTLCB2)

Məsul şəxs: Ərtoğrul Alışbəyli (İdarəçi)

Rol: Dizayner

Giriş

HTL-in əsas məqsədi müasir elmi dərsliklərin Azərbaycan dilinə hamıya əlçatan şəkildə tərcümə olunmasıdır. Təşkilat ictimai ianələrlə yığılan maddi vəsaitlə və könüllü əmək sayəsində bu missiyanı yerinə yetirir. HTL təşkilat olaraq heç bir kommersiya məqsədi daşımır.

Ümumi Müddəalar

1. Bu sənəd təşkilat ilə işə götürülən şəxs arasındakı peşəkar əlaqələri təsvir və təsbit edir.
2. Tərəflərin hər ikisi bu sənədi imzalamaqla sənəddə göstərilən müvafiq öhdəlikləri yerinə yetirəcəkləri ilə razılaşır, hüquqlarının nələr olduğunu anladığını təsdiqləyir.
3. Əmək prosesində yarana biləcək problemlər bu sənəddə və HTLCB2 nizamnaməsində göstərilən şəkildə öz həllini tapır.

İşə Götürülənin Öhdəlikləri

Ümumi Öhdəliklər

1. Nizamnamə ilə yaxından tanış olmaq və orada göstərilən qaydaları və normaları HTLCB2 çərçivəsində aparılan iş zamanı rəhbər tutmaq.
2. Təhvil verəcəyi iş üçün son tarixin təyin olunmasında konstruktiv şəkildə iştirak etmək.
3. İşin razılaşdırılan vaxtda yerinə yetirilməsi:
   1. Bu mümkün olmadıqda, bunun səbəbləri ilə bağlı koordinator və idarəçilərin vaxtında məlumatlandırılması və alınan qərarın yerinə yetirilməsi
4. İşin razılaşdırılan formada yerinə yetirilməsi:
   1. İşin bu sənəddə “İşə Götürülənin Spesifik Öhdəlikləri” bölməsində göstərilən formada yerinə yetirilməsi
   2. İşin “Nizamnamə”də göstərilən qaydalara əsasən yerinə yetirilməsi
   3. Bu mümkün olmadıqda, bunun səbəbləri ilə bağlı idarəçilərin məlumatlandırılması və alınan qərarın yerinə yetirilməsi
5. Komandadaxili kommunikasiyada aktiv iştirak
   1. Müzakirələrdə “Nizamnamə”də göstərilən davranış qaydalarına əməl olunması
   2. Kommunikasiya kanallarında şəxsinə göndərilmiş suala 2 iş günü ərzində cavabın verilməsi.
   3. Əgər 5b-də göstərilən müddətdə cavab vermək mümkün olmayacaqsa, bununla bağlı idarəçilərin mümkün qədər tez, ən geci 1 həftə əvvəldən məlumatlandırılması.

Spesifik Öhdəliklər

1. Mətni orijinal kitaba ən yaxın şəkildə yığılması
   1. Lazımi ölçülərin (fərqli mətn elementlərinin ölçüsü, sətirləri arası sahə, mətnin kənar sahələri) və digər xüsusiyyətlərin (rəng və s.) orijinal kitabın fiziki və ya rəqəmsal versiyasından alınması
   2. Lazımi fontların araşdırılması və eyni fontdan istifadə mümkün olmadıqda, ən yaxın fontlardan istifadə olunması
   3. Yuxarıdakı iki araşdırmanın nəticələrinin sənədləşdirilməsi
   4. Kitabda istifadə olunan elementlərin kitabxanasının yaradılması və paylaşılması
   5. Fəsil tərtibatını əks etdirən standart fəsil şablon faylının Adobe İnDesign və ya azad başqa bir proqram vasitəsilə yaradılması və Google Drive-a yerləşdirilməsi
   6. Şəkillərin orijinal rəqəmsal versiyadan əldə edilməsi
   7. Mətnin koordinatordan alınıb, şəkillərlə birgə yığılması
   8. Yığılmış mətnin (pdf formatında son məhsul və bütün dizayn faylları ilə birlikdə) müvafiq Google Drive qovluğuna yerləşdirilməsi
2. Məhsul yoxlama raundlarından keçdikdən sonra tərcüməçinin müvafiq proof faylında göndərdiyi düzəlişləri həyata keçirmək.
3. Mətni çapa hazır vəziyyətə gətirmək
   1. Yoxlamalar və düzəlişlər bitdikdən sonra son məhsulu çapa və kəsimə hazır vəziyyətə salmaq
   2. Fiziki nüsxənin çapında tərtibatla bağlı çıxan problemləri 2 gündən gec olmamaq şərtilə həll etmək

İşə Götürülənin Haqları

Ümumi Haqlar

1. Göstərdiyi əməyə görə adının və gördüyü işin son məhsulda qeyd olunması.
2. Öhdəlikləri ilə bağlı aydın və anlaşılan şəkildə məlumatlandırılmaq, məlumat əskikliyi hiss etdikdə məlumatı koordinator və ya idarəçilərdən tələb etmək
3. Öz işi ilə bağlı son tarixlərin təyin olunmasında iştirak.
   1. Son tarixlər idarəçilər tərəfindən əvvəlki təcrübəyə əsasən və işin ümumi gedişatını nəzərə alaraq təyin olunsa da, işçi spesifik vəziyyətinə uyğun olaraq bu tarixi müzakirə yolu ilə müəyyən qədər dəyişdirərək öz planlarına uyğunlaşdıra bilər.
4. Müvafiq email zəncirində və ya əmək razılaşmasında göstərilən məvacibin razılaşdırılmış zamanda alınması.
   1. Bu mümkün olmadıqda və işçini razı salan alternativ razılaşma qəbul edilənə qədər, işi dayandırmaq və edilmiş işə uyğun əmək haqqının ən geci 1 ay müddətində alınması.
5. Öz iş təhlükəsizliyinə xələl vurmadan iş və ya komanda üzvləri arasında şəxsi zəmində yaranan narazılığını dilə gətirmək
6. Öz iş təhlükəsizliyinə xələl vurmadan əmək şərtləri ilə bağlı idarəçilərlə sövdələşmək və əmək razılaşmasına ediləcək dəyişikliklərlə bağlı müzakirələrdə birbaşa iştirak etmək
7. “İşə Götürülənin Öhdəlikləri” bölməsində yazılan şərtlərə uymaq şərtilə, istənilən vaxt, koordinatoru məlumatlandıraraq kommunikasiyada və işdə fasilə yaradacaq tətillərin götürülməsi
8. “Nizamnamə”də daha ətraflı təsvir olunan fövqəlade hallarda, öz iş təhlükəsizliyinə xələl vurmadan iş yerindəki əmək pozuntuları ilə bağlı ictimaiyyəti məlumatlandırmaq

Spesifik Haqlar

• Mətnin orijinala uyğun şəkildə formatlanmış versiyasını təhvil almaq.
• Ehtiyac olarsa, tərcüməçi, elmi redaktor və korrektora verdiyi suallara 2 gün ərzində cavab almaq.
• Tərtib etməyi öhdəsinə götürdüyü fəsilə görə təyin olunmuş məvacibinin 90%-ini ilkin dizaynı təhvil verdiyi tarixdən, geri qalan 10%-ini isə fəsli yekunlaşdırdıqdan sonra ən geci 1 ay müddətində almaq.

Təşkilatın Öhdəlikləri

Ümumi Öhdəliklər

1. Təşkilatdaxili münasibətlərin və əmək prosesinin tənzimlənməsində “Nizamnamə”də göstərilən qayda və normaları rəhbər tutmaq.
2. İşçinin işini lazımi formada görmək üçün lazım olan texniki və peşəkar imkanların yaradılması, işin yerinə yetirilməsində yaranan çətinliklərin konstruktiv şəkildə həll edilməsi.
3. İşçidən gələn şikayəti adekvat şəkildə qəbul edib, lazımi ölçüləri götürmək və götürülən ölçülərlə bağlı işçini şəffaf şəkildə məlumatlandırmaq, bu mümkün olmadıqda isə, səbəblərini işçiyə çatdırmaq.
4. İşçini ona birbaşa təsir edən təşkilati normalar və qaydalarla bağlı şəffaf şəkildə məlumatlandırmaq.
5. İşçini ondan olan gözləntilərlə (məsələn, əmək üçün ayrılmış vaxt, işin necə görülməli olduğu və s.) bağlı şəffaf şəkildə məlumatlandırmaq.
6. Əmək prosesində işçi yaxından əlaqədə olmaq, ona təsir edəcək qərarlarla bağlı onun mövqeyini göz önünə almaq.
7. Əmək prosesi zamanı yaranan konfliktləri “Nizamnamə”də göstərilən qaydada, dəlillərə əsasən, lazım gələrsə, müstəqil məsləhətçilər şurası vasitəsilə, gəlinən hər bir nəticəni əsaslandıraraq həll etmək.
8. İşçinin məvacibini bu müqavilədə göstərilən zaman normalarına əsasən ona çatdırmaq.
9. İşçinin əməyini müvafiq məhsulda və digər yerlərdə (məsələn, veb saytda) lazımi qaydada qeyd etmək.
10. Müvafiq işçiyə, lazım gələrsə, işinin keyfiyyətini və içəriyini, insani keyfiyyətlərini, komandada işləmə qabiliyyətini və digər əlaqəli amilləri əks etdirən tövsiyyə məktubu hazırlamaq.
11. Təklif edilən əməyin sosial müdafiə və rifah baxımından etibarsızlığının işçiyə verdiyi iqtisadi qeyri-müəyyənliyə qarşı mübarizə aparmaq üçün bir təşkilat olaraq mümkün olan hər şeyi etmək.

Spesifik Öhdəliklər

1. Dizayneri orijinala uyğun şəkildə formatlanmış mətn faylı və ingiliscə orijinal faylla təmin etmək
2. Tərcüməçinin yoxlamasından sonra yaranan rəylərini dizaynerə Adobe Reader-in alətləri ilə aydın şəkildə qeyd olunmuş faylla çatdırmasını təmin etmək.
3. Büdcə daxilində dizaynerin əsaslandırılmış resurs tələblərini yerinə yetirmək. Bu resurslara kitab, texniki məsələlər ilə bağlı ehtiyaclar (proqram təminatı, kompüter, və s.) aiddir.

Təşkilatın Haqları

1. İşçidən işi bu müqavilədə göstərilmiş qaydalar çərçivəsində görməsini tələb etmək.
2. İşçinin işi razılaşdırılmış vaxtda təhvil verilməsini tələb etmək, işçi keçərli səbəb olmadan son tarixlərə uymazsa bu barədə müvafiq tədbirləri görmək.
3. Təşkilati qərarlarında “Nizamnamə”də və bu müqavilədə göstərilən normaları rəhbər tutmaq.
4. Komanda üzvlərindən kommunikasiya kanallarından istifadə etməyi və verilən suallara müvafiq müqavilələrdə göstərilən zaman çərçivələrində cavab verilməsini tələb etmək.
5. Əmək prosesində pozuntular olarsa müvafiq işçiyə xəbərdarlıqlar verdikdən sonra, lazım gələrsə, “Nizamnamə”də göstərilən şəkildə işçi ilə əməkdaşlığa son qoymaq